नवराज कार्की, क्यालिफोर्निया, अमेरिका
तिमी पुग्यौ कहाँ कहाँ त्यहाँ नेपाल छ ?
जहाँ पुगेँ म विश्वमा त्यहाँ नेपाल छ
म सोच्दछु केही कुरा पहिले नेपाली मै
अनि बदल्छु भाव त्यो भाषा भए कुनै
म देख्दछु निदाउँदा सपना नेपाली मै
आमा ! भनेर रुन्छु म हाँस्छु नेपाली मै
हिमाल छन् जहाँजहाँ त्यहाँ नेपाल छ
जहाँ गुराँस फुल्दछ त्यहाँ नेपाल छ
कहाँ पुगेन देश यो फूलको सुवास झैं
जूनघाम झैं जताततै फैल्यो बतास झैं
एउटा नेपाली होस् जहाँ त्यहाँ नेपाल छ
जहाँ छ मूर्ति बुध्दको त्यहाँ नेपाल छ
म बस्दछु जहाँ जहाँ त्यहाँ नेपाल छ
मनमा सधैं नेपाल छ म छु नेपाल छ
तिमी पुग्यौ कहाँ कहाँ त्यहाँ नेपाल छ
जहाँ पुगेँ म विश्वमा त्यहाँ नेपाल छ
००
साहित्यिक रचनाहरू सुन्दर लाग्यो । सबैलाई बधाई छ