शटडाउन सिलिकन भ्याली

-डा. दामोदर पुडासैनी किशोर

 

मन्दिर, मस्जिद, गुम्बा र गीर्जाघर बाहिर

उदास अनुहारमा मान्छेहरू टोलाइरहेछन्

 

बाटो छोट्याउँन खोजिरहेछन्  बटुवाहरू

बन्द हुने तर्खरमा छन् बिद्यालयहरू

जीवन र रसायनको अभावमा

बग्रन सकेकोछैन कारखाना

दाल , भात र डुकु अब सपना हुन लागेको छ

श्रमिकहरू कारख़ाना र खेतमा जान सकेका छैनन्

कर्मचारीहरू कार्यालयहरूमा भेटिँदैनन्

काम र वेतन दुबै टाढिँदै गएकोछ कामदारबाट

 

बैकमा खाता छन् , वासलात छ , कर्मचारी छन्

कम्तिमा पैसा त हुनुपर्थ्यो बैंकमा

तर अभाव छ त्यसैको

अचेल पैसाको किनवेच छोडेर

उँघ्न थालेका छन् बैँक कर्मचारी

 

पैसावालहरूलाई

अपहरण गर्ने योजना बनाउँदैछन् बैँकका कर्मचारी

भन्ने हल्ला चलेको छ

लोन फिर्ता गराइमाग्न

घर घर धाइरहेछन् सहकारीका सन्चालक

ब्याज तिर्नै नसकेर

साउँ समेत विर्सने सुरसारमा छन्

माइक्रो फ़ाइनैन्सका  ऋणीहरू

 

हाउजिँड॰ र इन्फरमेशन टेक्नोलोजीको नाममा ऋण लिनेहरू

भाग्दैछन् ऋण नतिर्ने बाटो खोजेर

मल नपाएर , बीउ नपाएर र औषधि नपाएर

उठन सकेको छैन बारीको बिरूवा

पसिना सिँचेर फलाएको  दाना , कोशा र लहराहरूलाई पनि

लुटेर खाइदिँदैछन् बिचौलियाहरूले

उता नेताहरू भने

चार भित्ताको छेका लागेर बनाउँदैछन् नोटका बिछौना

 

सडकमा गाड़ीहरू रमाएर गुडन सकेका छैनन्

आकाशमा क्रमश: घटिरहेछ बोइड॰ र एयरबसको ताँति

परदेशबाट घर फर्कने योजना थाँति बसेको छ

छोरा छोरी र नाति नातिना भेटन

युरोप ,अमेरिका र खाडीतिर जाने

बा , आमा र हजुरबुबा हजुरआमाको सपना अधुरै हुने सँकेत छ

मान्छे घुमन्ते प्राणी हो भन्ने त लेखिएको छ पुस्तकमा

तर , घरबाट निस्कन कुनै सामलतुमल छैन

 

लम्बिदै गइरहेछ ड्रोन युध्द

चम्किँदै गइरहेछ

जी सेवेन, जी ट्वान्टी ,नाटो र वार्साका अघोषित घुस्सरपन्जा

बार्ता र बन्दुकको छिनाझपटीमा ब्यापारको ढोका

आफैतिर खोल्न खोज्दैछन् चीन ,अमेरिका र आसेपासेहरू

 

मान्छेका

मुखमा माड लगाउने  गल्छेडाहरू

बिस्तारै खोस्न सकेकोमा

मुसुमुसु हाँस्दै अघि बढिरहेछ च्याट जीपीटी

 

सँकट त जहिलेपनि आउनसक्छ मान्छेलाई

सँकट टार्ननै खोज्ने हो नयाँ बाटो

खियाले कुरूप भैसके

तिमीले शताब्दीयौँ अघि खनेका

पूजीवाद र साम्यवादका सूत्रहरू

नयाँ बाटाहरू नखोजेर

किन सुतुरमुर्ग सुतिरहेछ आजको मान्छे ?

ज्वालामुखी बिष्फोट भएझैँ

भर्खरै खबर आएको छ-

शटडाउन सिलिकन भ्याली .

 

लेखक परिचयः दामोदर पुडासैनी किशोर विविध बिधाका सकृय लेखक हुन् । उनी पछिल्लो समय नियात्रा विधामा बढी केन्द्रित भएका छन् । उनका स्वदेश तथा विदेश भ्रमणका कृतिहरु प्रकाशित छन् । उनको पछिल्लो नियात्ता कृति “डोल्पो ओ डोल्पो” साझा प्रकाशनबाट प्रकाशित छ ।