सुभाषचन्द्र पौडेल भीमफेदीया
बाँच्नु मात्र पर्छ
के-के देख्न पाइन्छ
के-के लेख्न पाइन्छ
कहिले आँसुले
आँखा सेक्न पाइन्छ
कहिले हाँसोले
आँसु छेक्न पाइन्छ
सोच्दै नसोचेको
ठाउँ टेक्न पाइन्छ
बाँच्नु मात्र पर्छ
के-के देख्न पाइन्छ
के-के लेख्न पाइन्छ
तर
त्यसका लागि पनि
थेग्ने शक्ति चाहिन्छ।
(२३ पुस २०८१,सिड्नी,अष्ट्रेलिया)
000
कवि परिचयः कवि सुभाषचन्द्र पौडेल,भीमफेदीया मूलत कविता विधामा केन्द्रित साहित्यकार हुन् । उनको कविता सङ्ग्रह “तील गङ्गा गोविन्द”(विसं २०७९) तथा “सम्झना विर्सना” (२०८०) गद्यकृति प्रकाशित छन् । यसअघि उनको पहिलो कृति गीत,सङ्गीत तथा गायन क्षेत्रका साधकहरूसँगको भेटवार्ता “त्रिवेणीका लहरहरू” (विसं २०४४) श्रीरामसिंह वस्नेतसँगको सहलेखनमा प्रकाशित भएको थियो । उनले तीसको दशकमा “कुरौटे” साहित्यिक त्रैमासिक पत्रिका प्रकाशनको माध्यमबाट साहित्यिक पत्रकारको छवि समेत निर्माण गरेका थिए । मकवानपुरको भीमफेदीमा जन्मेका उनी हाल काठमाडौं वस्छन् ।
