राजेश ढुङ्गाना
लेख्छु भनेको कविता
बुवाको स्मृतिमा
तर
आँसुमा कविता नलेखिँदो रहेछ
त्यसैले लेख्न सकिन
बुवाको कथामा कविता
हो,
प्रत्येक पल्ट लेख्न खोज्दा
आँसुको बतासले
कापीको पन्ना उडाइ लान्छ
सक्दिन म लेख्न
फेरि पनि
बुवाको कथामा एउटा कविता
म जति बेला
जीवनको सबैभन्दा धेरै
आँसु रोएको थिएँ
मुटुमा
म
यति बेला पनि
लेख्न नसकेर
बुवाको कथामा एउटा कविता
केवल
बुवाले सधैँ खाने
एउटै थाल र गिलास हेरेर
मुटुमा
मुटुकै आँसु रोइरहेछु
सम्भवतः सक्दिन होला म
लेख्न, बुवाको कथामा
एउटा कविता ।
०००
कवि परिचयः कवि राजेश ढुङ्गानाको जन्म सिन्धुली तोश्राम खोलामा भएको हो । हाल उनी भद्रपुर झापामा बस्छन् । २०३६ ताक कविता प्रकाशनबाट साहित्य यात्रा थालेका उनको दुई कविता सङ्ग्रह प्रकाशित छ, “सुकिला मान्छेको सामयिक मृत्यु” (विसं २०७०) तथा “मैले खोजेको देश” (२०८१) प्रकाशित छन् ।
