१२ साउन २०८१, काठमाडौं
नेपाल प्रज्ञा प्रतिष्ठानका पूर्व कूलपति वैरागी काईंला तथा लेखकसहित मञ्चासिन अतिथिहरुले अनामनगर काठमाडौंमा आयोजित एक समारोहका वीच कथाकार गोपी मैनालीको कथासंग्रह “विशृंखलित सपना” को लोकार्पण गरे । लोकार्पण समारोहलाई सम्बोधन गर्दै प्रमुख अतिथि काइँलाले समालोचक एवम् निबन्धकारले नेपाली वाङ्मयलाई कथा बिधामा पनि कृति दिएकोमा बधाइ दिंदै समाजका विषयबस्तुलाई सरल ढंगबाट प्रस्तुत गरेको बताए ।
बिमोचित कृतिमाथि समालोचक प्रा डा लेखप्रसाद निरौलाले समीक्षा गर्दै शब्द, संरचना, प्रस्तुति र कथाबस्तुका आधारमा मैलालीका कथा निकै उच्च कोटीको भएको विचार ब्यक्त गरे ।
अतिथि पूर्व महालेखा परीक्षक टंकमणि शर्माले इमान्दारिता र सदाचारिताका उदाहरणीय पूर्व प्रशासककाट सुन्दर कथा सिर्जना भएकोमा बधाई ज्ञापन गरे ।
अतिथि नायक सरोज खनालले राम्रा कथा लेखेर चलचित्र र नाटकको स्तर उकास्न मैनालीजस्तै अरुले पनि योगदन दिन अनुरोध गरे ।
सो अवसरमा सुरभि साहित्य प्रतिष्ठानका संरक्षक वेदमणि घिमिरे, साहित्यिक पत्रकार संघका अध्यक्ष राधेश्याम लेकाली, अन्तराष्ट्रिय नेपाली साहित्य समाजका राजेन्द्र केसी तथा लोकसेवा आयोगका पूर्व अध्यक्ष उमेशप्रसाद मैनालीले शुभकामना मन्तब्य दिएका थिए ।
समारोहलाई विमोचित कृतिका स्रष्टा कथाकार गोपी मैनालीले पनि आफ्नो लेखकीय मन्तब्य प्रकट गरेका थिए ।
अध्यक्षताको आसनबाट सुरभि साहित्य प्रतिष्ठानका अध्यक्ष बाजुराम पौडेलको अध्यक्षतामा सम्पन्न सो बिमोचन समारोहको कार्यक्रम सञ्चालन प्रतिष्ठानका सचिव अच्युत घिमिरेले गरेका थिए ।
