पूजा चन्द, बाल्टिमोर
नत मष्तिकमा शव्दहरू सल्बलाउँछन्
नत हातहरूले कलम नै चलाउँछन्
फगत एक मुडो म,
लरखराउँदै हिंड्ने कोसिस गरिरहेछु
हैन हैन हिंड्ने होइन, घिसारिने कोसिस गरिरहेछु
साथहरू त सबै छुटे कि क्या हो
कतै अल्झेको बेला सम्झिने कोसिस गर्छु
यादहरू मात्र छन् जो वतास जतिकै वत्तिन्छन
आकास जतिकै चुलिन्छन र एक विन्दुमा पुगेर
गर्ल्याम गुर्लुम्म भत्किन्छन्
फेरि एकपल्ट महशुस गर्छु
म त फगत एक मुडो ।
एक समय थियो, मेरा चाहनाहरूको
आक्रोसित द्वन्दहरूले पछ्याई रहन्थे तिमीलाई
कहिले भेटिए झैं लाग्थ्यो
फेरि कहिले त्रसित र भयावह मुद्रामा
तिमी भागीरहे झैं
तिमी अघि अघि, म पछि पछि
बर्षौं बित्यो भेट्ने चाहनामा
शायद थाकें म, मेरै चाहनाले थकायो मलाई
रोकियो मेरो गति अनि व्यग्रता
रोक्नु र रोकिनुमा पनि ठुलै संघर्ष थियो
भक्कानिएर एक्लिएका कैयौं प्रहरहरूमा
अविरल बर्षाहरूले निथ्रुक्क भिजीरहें
तिम्रो तापको आशमा कठ्यांग्रिएको मुटु
लाग्छ केवल अब धुकधुकी मात्र बाँकी छ
त्यसैले त आज म फगत एक मुडो
समयको वहाब संगै वगिरहेछु ।
कवि परिचयः काठमाडौं बाड भन्ज्याङमा जन्मिएकी पूजा चन्द चर्चित नायिका हुन् । तर उनको कलम भने सानैदेखि साहित्यमा चल्ने गर्थ्यो । उनी रेडियो नेपालको बाल कार्यक्रममा कविता पढ्न पुग्थिन् । नेपालमा छँदा साहित्यिक पत्रिका रत्नश्रीमा पनि उनका कविता प्रकाशित थिए । उनको कलम कविता तथा गीतमा चल्ने गरेको छ । उनको शव्दमा “कसरी सम्झाउँ ?” गीतको एल्बम प्रकाशित छ । सन् २००५ देखि अमेरिकामा बसोवास गरिरहेकी उनी हाल बाल्टिमोर बस्छिन् र अन्तरराष्ट्रिय नेपाली साहित्य समाज मेरिल्याण्ड चयाप्टरको अध्यक्ष छिन् ।
