तारा के.सी
प्रिय छोरी !
तिमी विश्व मानचित्र पल्टाएर
आफू अनुकूलको देश खोजिरहेछ्यौ
म आफ्नै घरबाट हराएको,
मेरो नाम खोजिरहेकी छु ।
तिमी महासागरको कुरा गर्छ्यौ
आइफल टावर फन्को मार्छु भन्छ्यौ
म यति बेला मेरै चोकसित बिरानो छु
हराएको मेरो परिचय खोजिरहेछु ।
मलाई,
बाग्मतीको सफा पानीमा
मेरो देशको प्रतिबिम्व हेर्न मन छ
लाग्छ ,
म जन्मेको आँगनभन्दा पर मेरो भुगोल छैन्
सगरमाथाभन्दा पर मेरो कुनै देश छैन
म कसैकी छोरी
कसैकी बुहारी भएर
तिम्रै नामबाट आमा बनेर चिनिएँ ।
छिमेकभन्दा अलि पर मेरो कुनै परिचय छैन् ।
जन्म घरमा ठूली भन्थे बा-आमाले
कर्मघरमा कान्छी भएँ
पछि यो देशको नागरिक भएँ
ठूली-कान्छी भएर ।
मलाई पनि तिम्रै जस्तो नाम प्यारो लाग्थ्यो
तिमी जस्तै स्वतन्त्र भएर गगनमा उडुँ उडुँ लाग्थ्यो
तर मैले त तिम्रै लागि भाँचेकी हुँ उड्ने पखेटा
तिम्रै लागि थुनेकी हुँ,
संसार चिहाउने स-साना सञ्झ्यालहरू
एउटै रूखको हाँगामा झुन्डिएर मैले
गरेकी हुँ सबथोक तिम्रा लागि।
प्रिय छोरी !
कोसी तर्दा तर्दै काँसजस्तै सेतै फुलेका
बा- आमा बस्ने तीर्थभन्दा पर
मेरो कुनै मन्दिर छैन ।
तिमी यतिबेला,
झाँगिन चाहन्छ्यौ पीपल जस्तै
र फैलिन चाहन्छ्यौ पर- परसम्म
साँघुरो भैसक्यो यो भुगोल तिम्रो लागि अब ।
मलाई थाहा छ,
तिम्रो पदचाप पछाउँदै हिंड्नेछन्, घाम- जून
एक अँगालो घाम च्यापेर पस्ने छ उज्यालो
तिम्रै लागि आशीर्वादका मन्त्र पढ्ने छन् बाजे-बजूले
तिम्रो स्वर्णिम भविष्यको लागि ।
म भने
बल्दा बल्दै सकिने मैनबत्ती भएँ र
अरूकै लागि बलेर सकिएँ
प्रिय छोरी !
तिम्रो र मेरो लागि कहिल्यै यो समय
समानान्तर दुरीमा हिँडेन
म हिड्ने सानो गोरेटो
र
तिमी दौडने फराकिलो राजमार्गले
कहिल्यै हामीलाई छोएन ।
कवि परिचय: तारा के.सी कविता, लघुकथा र वाल साहित्यमा कलम चलाउँछिन् । उनका प्रकाशित कृतिहरुमा तारापुञ्ज कविता सङ्ग्रह(२०६७), फूलबारी बालकविता संङ्ग्रह (२०७०), फिन्को र टोरी बालकथा संङ्ग्रह(२०७४), प्रिय छोरी कविता संङ्ग्रह ( २०७५), .आधुनिक खोज लघुकथा संङ्ग्रह(२०७८), गुरूको छनौट बालकथा संङ्ग्रह(२०७९) रहेका छन् । उनी कल्पलता र शंसाक साहित्यिक पत्रिकाको सम्पपादनमा पनि संलग्न छिन् । पनौती काभ्रेमा जन्मेकी उनी हाल उनको वसोवास गोङ्गबु काठमाडौं छ ।
समसामयिक र सार्थक कविता। बधाई छ !