काठमाडौं, २६ ज्येष्ठ
काठमाडौंमा राष्ट्रिय जनसाहित्यिक सङ्घ, नेपालद्वारा आयोजित ‘अविरल काव्य यात्रा’ को ७९ औँ शृङ्खलामा कवि रमेश शुभेच्छुले एक दर्जन कविता प्रस्तुत गरे । शुभेच्छुले करिब दुई दशक बिचमा रचना गरेका एक दर्जन कविता प्रस्तुत गरेका हुन् ।
स्वागत मन्तव्य र कवि परिचयपछि रमेश शभेच्छुकले ‘मेरो परिवार’, ‘अँध्यारो’, ‘स्वयम्भू’, ‘आमाको मुख’, ‘रातो बत्ती’ र ‘उल्टो न्याय’ गरी छ ओटा कविता वाचन गरे । त्यसपछि कवि सुभेच्छुकका कविताहरु बिभिन्न कविहरुले प्रस्तुत गरे । कवि जय गौडेलले ‘हन्मेर्नो’, कवि नारायण निरासीले ‘अचानो’, कवि देवु लुइँटेलले ‘माझी’, कवि गीता सापकोटाले ‘आमा’ र ‘द्रोणाचार्यमाथि अभिमन्यु प्रश्न’, कवि डम्बर पहाडीले ‘लुखुरेको वादी’ वाचन गरी कवि शुभेच्छुकका कवितामा थप ओज प्रदान गरे । स्मरणीय छ, शुभेच्छु आफै सशक्त कवि, वाचक र शास्त्रीइ एवम् लोककलाका विशिष्ट प्रशिक्षक पनि हुन् ।
राष्ट्रिय जनसाहित्यिक सङ्घ, नेपालका अध्यक्ष राम विनयको अध्यक्षतामा सम्पन्न सो कार्यक्रममा प्रतिनिधि सभाका सांसद् माननीय दयालबहादुर शाहीको प्रमुख आतिथ्य रहेको थियो । राष्ट्रिय जनसाहित्य सङ्घ, नेपालका महासचिव प्रकाश सिलवाललेद्वारा सञ्चालित उक्त कार्यक्रममा डा. हरिप्रसाद सिलवालले कवि रमेश शुभेच्छुकको साहित्यिक परिचय दिएका थिए । प्रा. केशवप्रसाद सुवेदीले वाचित कविताको समीक्षा गरेका थिए ।
कार्यक्रममा बोल्दै प्रमुख अतिथिले यस युगका लेखकले महाभारतको युगका व्यासको काम गरेको बताए । उनले लेखकहरुले हामीलाई प्रेरित गर्न सक्ने गरी लेख्नुपर्ने भन्दै लेखनले समाज परिवर्तनमा सघाउँछ भन्ने विचार राखे । करिब तीन घण्टासम्म सञ्चालन भएको उक्त कार्यक्रम राष्ट्रिय जनसाहित्यिक सङ्घ, नेपालका उपाध्यक्ष नर्मदेश्वरी सत्यालले उपस्थित पाहुनाहरुलाई धन्यवाद ज्ञापन गर्दै सभाको समापन गरेकी थिइन् ।
