२५ बैशाख २०८३, काठमाडौं
नेपाली कथा साहित्यमा पुनर्जागरण अभियान अन्तर्गत २०८० साउनदेखि प्रत्येक महिनाको अन्तिम शुक्रबार काठमाडौंमा गरिँदै आएको मासिक कथावाचन कार्यक्रमको तीसौं श्रृङ्खला सम्पन्न भएको छ ।
सधैँ झैँ कुनै दिवंगत स्रष्टाको सम्मानमा एउटा कथा वाचन गरेर कार्यक्रम आरम्भ गर्ने गरिए अनुसार सर्वप्रथम कथाकार हृदयचन्द्र सिंह प्रधानको कथा ‘सौता’ डा पबित्रा अधिकारीले वाचन गरिन् । त्यसपछि अन्य तीन जना प्रतिष्ठित कथाकारहरूले २०७० को दशकका बिभिन्न वर्षमा प्रकाशित आआफ्ना कथाहरू वाचन गरेका थिए ।
कथाकार रमेश जङ्ग थापाले ‘हाम्रा बा हुन्नन्’, कथाकार प्रमोद प्याकुरेलले ‘छ्याक लोह’ र कथाकार इन्दिरा प्रसाईले ‘श्री’ शीर्षकको कथा वाचन गरे ।
कार्यक्रमको शुरुमा परिकल्पनाकार पुष्कर लोहनीले नेपाली कथा साहित्यमा पुनर्जागरण ल्याउने पवित्र उद्देश्यले दुई जनाको परिकल्पनामा शुरु गरिएको यो अभियान आज कथाकारहरू र कथाका गम्भीर पाठकहरूबीच लोकप्रिय हुँदै गएकोमा प्रसन्नता व्यक्त गरे । उहाँले यसमा प्रतिष्ठित कथाकारहरू र भरखर कथा प्रकाशन गर्न थालेका नयाँ पुस्ताका प्रतिभावान स्रष्टाहरूलाई पनि मौका दिने गरिएको कुरा स्मरण गराए ।
कार्यक्रममा कथाकारहरूका अतिरिक्त सदा झैं कथाप्रेमीहरूको उपस्थिति थियो । स्रष्टाहरूसँगको अन्तर्कृयामा कथाकार र कथानुरागीहरू शैलेन्द्र साकार, हरिबोल आचार्य, निर्मला ढुंगाना, जेठा बैरागीलगायतले भाग लिनुभएका थिए ।
कार्यक्रमको अन्त्यमा अभियानका अर्का परिकल्पनाकार चन्द्रप्रसाद भट्टराईले धन्यवाद ज्ञापन गर्दै आजका कथाहरूको सङ्क्षिप्त चर्चा गरेका थिए ।
बिगत महिनाहरूमा झैं उपन्यासकार शुकदेव उपाध्यायले कार्यक्रम सञ्चालन गरेका थिए ।
यो मासिक कार्यक्रम शुरुभएदेखि नै साहित्यकार पुष्कर लोहनीको निवासस्थित सभाकक्ष, डिल्लीबजार, घट्टेकुलो, काठमाडौंमा हुने गरेको छ ।
०००
