विश्वपरिक्रमा डेस्क
२३ सेप्टेम्वर, वाशिंटन डिसी
नेपालको सवैभन्दा पुरानो नीजि क्षेत्रवाट दिइने नेपालको नोवेल पुरस्कार मानिने मदन पुरस्कार यस वर्ष “लिम्वुवानको ऐतिहासिक दस्तावेज सङ्ग्रह सम्वत् १७१९-२०२०” का लागि प्रदान गरिने भएको छ । त्यसैगरी यस वर्षको जगदम्वाश्री पुरस्कार “सात दशकदेखि नेपाली नृत्य विधाको अध्ययन, अनुसन्धान र मञ्चन गर्दै सैध्दान्तिक तथा प्रयोगात्मक ज्ञान मार्फत् नृत्यक्षेत्रको उन्नयनमा समर्पित रहनु हुने” भैरव वहादुर थापालाई प्रदान गरिने निर्णय भएको मदन पुरस्कार गुठीका अध्यक्ष कुन्द दीक्षित हस्ताक्षरित २०७८ असोज ५ गते प्रवाहित प्रेस विज्ञप्तिमा जनाइएको छ ।
मदन पुरस्कार विसं २०१३ सालदेखि प्रदान गर्न थालिएको हो । वर्षभरि प्रकाशित उत्कृष्ट नेपाली भाषाको ग्रन्थको लागि मदन पुरस्कार दिइन्छ । दिवङ्गत जनरल मदन शम्शेरको स्मृतिमा उनकी धर्मपत्नी जगदम्वा महारानीले यो पुरस्कार स्थापना गरेकी हुन्, तर यो पुरस्कार स्थापनाका लागि कमल दीक्षितको ठूलो योगदान रहेको छ ।
जगदम्वाश्री पुरस्कार महारानी जगदम्वाको देहावसानपछि स्थापना भएको हो र पहिलोपल्ट विसं २०४५ सालमा “तीन दशकभन्दा बढी समयदेखि सङ्गीतको माध्यमबाट नेपाली भाषाका गीतहरूलाई देश तथा विदेशमा समेत लोकप्रिय बनाउनमा उल्लेखनीय योगदान गरेबापत” विख्यात गायक नारायणगोपाल गुरुवाचार्यलाई प्रदान गरिएको थियो ।
यस वर्ष मदन पुरस्कारको लागि २२२ पुस्तक प्रतिस्पर्धामा थिए र ९ पुस्तक श्रेष्ठ सूचिमा परेका थिए ।
