२१ भदौ २०८३, काठमाडौं
नेपाली वाङ्मय जगतको जेठो नीजि क्षेत्रको प्रतिष्ठित मदन पुरस्कार वि.सं. २०८२ का लागि वीणा जोशी (राजभण्डारी)को कृति “नेवार समुदायका परम्परागत मुकुण्डोनाच” पुस्तकका लागि प्रदान गरिने भएको छ । यस अघि गुठीले १० पुस्तकहरूको सूचि प्रकाशित गरेको थियो, जसमध्ये यो कृति विजेता भयो । नेपाली भाषाका उत्कृष्ट कृतिलाई दिइने पुरस्कार भएकोले मदन पुरस्कार साहित्यिक पुरस्कार भने होइन । त्यसैले जबजब साहित्य इतर पुस्तकले मदन पुरस्कार पाउँछ, सधैं साहित्यिक पुस्तकबाट पुरस्कार टाढिएको बहस हुने गर्दछ । त्यसो त मदन पुरस्कार बिजेता कृतिहरूको सूचि हेर्दा साहित्यिक पुस्तकहरूकै र त्यसमा पनि उपन्यास विधाको बर्चस्व रहेको देखिन्छ ।
वीणा जोशी मदन पुरस्कार पाउने पाँचौं महिला हुन् । सबभन्दा पहिले वि.सं. २०२२ सालमा पहिलोपल्ट पारिजातले “शिरिषको फूल” उपन्यासका लागि प्राप्त गरेकी थिइन् । त्यसपछि झमक घिमिरे, राधा पौडेल तथा नीलम कार्की निहारिकाले पाएका थिए ।
त्यस्तै २०८२ सालको जगदम्बाश्री पुरस्कार “छ दशकदेखि गीत लेखनमा समर्पित” गीतकार किरण खरेललाई प्रदान गरिने निर्णय भएको छ । नेपाली गीति साहित्य जगतमा किरण खरेलका गीतहरू सर्वाधिक गाईएका छन् र सयौं गीत कर्णप्रिय र सदावहार रहेका छन् ।
स्मरणीय छ, मदन पुरस्कार वि.सं. २०१३ सालदेखि प्रदान गर्न थालिएको हो । सुरुमा मदन पुरस्कारको राशी चार हजार रहेको थियो, हाल यो चार लाख रहेको छ ।
त्यस्तै जगदम्बाश्री रानी जगदम्वाको देहान्तपछि वि.सं. २०४५ सालमा पहिलोपल्ट स्वर सम्राट नारायण गोपाललाई पहिलोपल्ट प्रदान गरिएको थियो । यो पुरस्कारको राशी हाल चार लाख रुपैयाँ रहेको छ ।
०००
