२६ फागुन २०८२, काठमाडौं
नेपाल भाषाका शक्तिशाली कवि, पत्रकार, ब्यङ्ग्य लेखक तथा साँस्कृतिक निबन्ध लेखनका सिध्दहस्त प्रतिभा सुरेश किरणको हृदयाघातको कारण २५ फागुन २०८२ का दिन देहान्त भएको छ । उनी पछिल्लो समय भाषा आयोगका सदस्य रहेका थिए ।
वि.सं.२०२३ सालमा जन्मेका उनले नेपाल भाषाको पत्रिका ‘ईनाप’ बाट पत्रकारिता सुरु गरेका थिए ।
उनले नागरिक दैनिक, कान्तिपुर दैनिक, नेपाल म्यागाजिन, गोरखापत्र, नेपाल समाचार पत्र, रातो पाटी, सेतो पाटी लगायतमा नियमित रुपले साँस्कृतिक लेख, समसामयिक राजनैतिक लेख तथा ब्यङ्ग्य लेख्ने गर्दथे ।
उनी सन्ध्या टाइम्स, नेपाल भाषा टाइम्स लगायतका पत्रिकाको सम्पादनको जिम्मेवारीमा पनि रहेका थिए ।
उनको संलग्नता अप्सरा फिल्म म्यागाजिन, कोशल्वहं चिनाखँ स्वलापौमा समेत रहेको थियो । उनी नेपाल प्रज्ञा प्रतिष्ठानबाट प्रकाशित हुने थाय्भू पत्रिकाको सम्पादक मण्डलमा समेत रहेका थिए ।
उनको नेपाल भाषामा ” ‘थौं घन्टाघरं जिके ई न्यनाच्वन’ आधुनिक कविता सङ्ग्रह प्रकाशित छ । साथै पद्मरत्न तुलाधरको जीवनी ‘पद्मरत्न तुलाधर’ समेत प्रकाशित छ । यसका साथै उनको शोधपत्र ‘२०४६ साल जनआन्दोलनय् विश्वभूमि न्हिपौया भूमिका’समेत प्रकाशित रहेको छ ।
उनका नेपाल भाषाका कविताहरुको नेपाली अनुवाद समेत विभिन्न पत्रपत्रिकामा प्रकाशित रहेका छन् ।
