१६ साउन २०८२, काठमाडौं
वि.सं. २०८२ जेठ १६ गते निधन भएका साहित्यकार विजय चालिसेको स्मृतिमा राजधानीका विभिन्न २१ संस्थाद्वारा श्रद्धाञ्जलि श्रद्धाञ्जलि सभा आयोजना गरियो ।
विजय चालिसेको तस्वीरमा माल्यार्पण सहित शुरू भएको उक्त कार्यक्रममा बोल्दै वरिष्ठ समालोचक ठाकुर शर्माले चालिसेका वहुविधामा ५६ कृतिहरू प्रकाशित भएको जानकारी दिए ।
गोकर्णेश्वर नगरपालिकाका प्रमुख दिपक रिसालले स्कुले जिवनमा आफ्ना गुरु समेत रहनुभएका चालिसेसँग साहित्यिक, सामाजिक क्षेत्रमा काँधमा काँध जोडेर काम गर्ने अवसर पाएको स्मरण गर्दै वहाँ जस्ता प्रतिभाहरूको सहयोग, प्रेरणा र हौसलाले गर्दा नै गोकर्णेश्वर नगरपालिकाले साहित्य क्षेत्रमा अनुकरणिय काम गर्न सफल भएको बताए ।
वरिष्ठ पत्रकार पुरुषोत्तम दाहालले पत्रकारिता क्षेत्रमा लामो समय बिताएपनि साहित्यिक क्षेत्रमा उत्तिकै अब्बल हुनुहुन्थ्यो भने ।
चालिसेका कान्छा सुपुत्र आलोकले भूमिका पिताले निभाउनुभएको सामाजिक, शैक्षिक, पत्रकारिता र साहित्यको पाटो बारे स्मरण गर्दै वहांको योगदानलाई स्थायी बनाउन विजयलक्ष्मी ट्रष्ट स्थापना गर्न लागिएको बताए ।
वरिष्ठ साहित्यिक पत्रकार रोचक घिमिरेले रमेश विकल साहित्य प्रतिष्ठानको स्थापनादेखिनै विजयको सकृयता बारे स्मरण गर्दै उनको योगदान बिना प्रतिष्ठान आजको अवस्थामा आउन नसक्ने बताए । पिता रमेश विकलको भन्दा भैरव अर्यालको प्रेरणाबाट विजय साहित्यमा लागेको उनको कथन थियो ।
कार्यक्रममा ललितकला प्रज्ञा प्रतिष्ठानका पूर्व कुलपति के के कर्माचार्य, नेपाल प्रज्ञा प्रतिष्ठानका पूर्व सदस्यसचिव प्राध्यापक जगत उपाध्याय, स्रष्टा पदयात्रा नेपालका अध्यक्ष शितल गिरि, अभिनव साहित्य समाजका गोविन्द घिमिरे ‘वेदमणि’, अरुणिमा शैक्षिक प्रतिष्ठानका अध्यक्ष शम्भु बडाल, पोषण पाण्डे तीर्थ सदनका प्रतिनिधि रञ्जु पाण्डेले श्रद्धान्जली मन्तब्य प्रकट गरेका थिए ।
सो सभा साहित्य सदन नेपालका अध्यक्ष प्रा.डा. हेमनाथ पौडेलको सभापतित्व, रमेश विकल साहित्य प्रतिष्ठानका अध्यक्ष तथा वरिष्ठ साहित्यकार र एवं साहित्यिक पत्रकार रोचक घिमिरेको प्रमुख आतिथ्यमा सम्पन्न भएको थियो ।
