१२ पुस २०८२, पनौती,काभ्रे ।
सुनकोशी वाङ्मय प्रतिष्ठान र जनमैत्री बचत तथा ऋण साकोसको संयुक्त आयोजनामा ‘साहित्यसँग सहकारी र पर्यटन विषयक’अन्तरक्रिया कार्यक्रममा वक्ताहरुले सहकारी र पर्यटनसँग साहित्यको अन्योन्याश्रित सम्बन्ध भएको बताए ।
उक्त कार्यक्रममा प्रा.डा.लक्ष्मणप्रसाद गौतम,वरिष्ठ साहित्यकार श्रीओम श्रेष्ठ रोदन,साहित्यकार एवं पर्यटन व्यवसायी प्रदीप सापकोटा र सहकारीकर्मी श्यामहरि सापकोटाले उक्त अन्तरक्रिया कार्यक्रममा भाग लिएका थिए ।
छलफलमा सहभागी हुँदै समालोचक तथा साहित्यकार प्रा.डा. गौतमले भने ‘सामुहिक भावनाबाट जन्मेको सहकारी वर्तमान अबस्थामा विचलन नभैकन राम्रा कार्यहरु गरिरहनु आफैमा उल्लेखनीय भएको छ।’ उनले साहित्यकारले अनुभूत गरेका कुराहरु लेख्ने भएकोले संस्थागत प्रचारमा पनि साहित्यको भूमिका बढ्ने बताए । सहकारी आर्थिक कारोबार मात्र नभई साहित्यको सेवा गर्न पनि सक्षम छ भन्ने प्रस्तुत कार्यक्रमले स्पष्ट पारेको प्रा.डा.गौतमले बताए ।
वरिष्ठ साहित्यकार श्रीओम श्रेष्ठ ‘रोदन’ले साहित्यको उन्नयन र विकासमा सहकारीले धेरै योगदान गर्न सक्ने बताए । उनले पर्यटनको विकासमा साहित्यको महत्वपूर्ण योगदान रहेको बताए । हिजोका परिकल्पना आज व्यवहारिक प्रयोग भएको भन्दै उनले साहित्य,पर्यटन र सहकारीलाई संगै जोडेर लैजानुपर्नेमा जोड दिए ।
पर्यटन व्यवसायमा समेत संलग्न साहित्यकार प्रदीप सापकोटाले साहित्यले पर्यटनको बिकास हुने बताए । उनले साहित्यले पर्यटनको विकासमा योगदान गर्नसक्ने भन्दै यसको निम्ति सम्बन्धित पक्षले पहलकदमी लिनुपर्ने बताए ।
श्यामहरि सापकोटाले साहित्य र पर्यटनको विकासमा सहकारीको भूमिका अहं रहेको बताए ।उनले साहित्यिक कार्यमा सहकारीको सहयोग रहँदै आएको उल्लेख गरे ।
उक्त कार्यक्रममा कवि पवन आलोक,छविरमण सिलवाल,श्रीओम श्रेष्ठ ‘रोदन’,प्रदीप सापकोटा,मधु पाठक,सुमन सौरभ,पूर्णबहादुर श्रेष्ठ,लोकनाथ सापकोटा,रामसुन्दर देउजा लगायतका कविहरुले आफ्ना सृजनाहरु बाचन गरे ।
शंकर भारती,बालकृष्ण तामाङ लगायतले पनि आफ्ना धारणाहरु राखेको उक्त कार्यक्रमको अध्यक्षता रामचन्द्र सापकोटाले गरेका थिए । जनमैत्रीका उपाध्यक्ष सापकोटाले सुन्दर कार्यक्रम भएको टिप्पणी गर्दै आगामी दिनमा यस्ता कार्यक्रमले निरन्तरता पाउने बताए । जनमैत्री साकोसका प्रमुख व्यवस्थापक बेदप्रसादले जनमैत्रीको वर्तमान अबस्थाको बारेमा प्रकाश पारे।
श्यामहरि सापकोटाको स्वागत एवं कोषाध्यक्ष तिर्थराज सापकोटाले धन्यवाद ज्ञापन गरेको उक्त कार्यक्रम पत्रकार राजेश खनालले सञ्चालन गरेका थिए ।
कार्यक्रमको औचित्यबारे सुनकोशीका अध्यक्ष छविरमण सिलवालले प्रकाश पारेको उक्त कार्यक्रममा साहित्यकार एवं अन्य सहकारीकर्मीहरुको उपस्थिति रहेको थियो ।
०००
