जेबी खत्री
ह्रदयको पानाभरि
लेखेर प्रेम-पत्र
रगतको मसीले
फेरि किन मेटायौ ?
कहिल्यै बिर्सन
नसक्ने गरि
म यति बेला
आँसुले धोइरहेछु
तिनै ह्रदयका पानाहरू
म हटाउन चाहन्छु
ती दागहरू
यो ह्रदयबाट
सधैं भरीलाई
र सफा ती
ह्रदयका पानाहरूमा
लेख्न चाहन्छु म
बरु आफ्नै कथा
आफ्नै व्यथा
के गर्नु
भिजेर आँसुले
निथ्रुक्क भएपछि
कति पानाहरू
चुँडिएर गए
तर
जाँदा रहेनछन्
रगतका ती दागहरू
लागि सकेपछि
अर्का पटि छिचोली
सकेपछि ।
000
कवि परिचयः कवि जेबी खत्री चुवाडे पाँचथरमा जन्मेका हुन् र हाल शिवसताक्षी झापा बसोवास गर्छन् । उनको पहिलो प्रकाशित रचना “लल्लिका शिकारहरू” विसं २०५० मा झुल्के घाम साप्ताहिकमा प्रकाशित भएको थियो । उनको एक कविता सङ्ग्रह “बन्साका बोटहरू” (२०७०) तथा दुई उपन्यासहरु “चितामाथिको लास” (२०५१)र “दुस्सह” (२०७२) प्रकाशित छन् । उनको एक गीति एल्बम समेत प्रकाशित छ ।
