२९ वैशाख २०८२, काठमाडौं
नेपाली साहित्यलाई डिजिटल माध्यमबाट साहित्यको विश्व बजारमा जाने लक्षसहित व्यावसायिक रुपमा सञ्चालित साहित्यिक वेव साईट साहित्य पोष्टले पाँच वर्ष पूरा गरेको छ ।
साहित्यिक समाचार र साहित्यिक रचनाहरुलाई दैनिक र नियमित रुपले अपडेट गरिने व्यावसायिक वेव साइट साहित्यपोष्ट नै पहिलो हो र आजको समयमा यो यस प्रकारको एक्लो वेव साइटको रुपमा देखा परेको छ र लाखौं पाठकलाई आकर्षित गर्दै जाने क्रममा निरन्तरता रहेको छ ।
साहित्य पोष्टले पहिलो पुस्तक प्रकाशित गर्ने नवान्तुक लेखकका लागि कविता, आख्यान तथा गैर आख्यानमा ५०.५० हजारको पुस्तक पुरस्कार पनि प्रदान गर्दै आएको छ ।
त्यस्तै पछिल्लो समय पुस्तक प्रकाशनको क्षेत्रमा समेत साहित्यपोष्ट अग्रसर हुँदै गएको छ । हालसम्म साहित्य पोष्टको ब्यानरमा ५० बढी कृतिहरु प्काशित भइसकेका छन ।
पाँचौं वार्षिकोत्सवका अवसरमा विश्वपरिक्रमासँग कुरा गर्दै साहित्य पोष्टका प्रधान सम्पादक अश्विनी कोइरालाले साहित्य पोष्टले छिटै साहित्य पोष्ट एप सञ्चालनमा ल्याउने र यसले नेपाली साहत्यलाई विश्वभर छिटो, छरितो रुपमा उपलब्ध हुने विश्वास व्यक्त गरे ।
साहित्य पोष्टका प्रधान सम्पादक अश्विनी कोइराला “प्रेमालय”, “जुकर्बर्ग क्याफे”, “उनी” जस्ता लोकप्रिय पुस्तकका लेखक हुन् र लामो समय कान्तिपुर प्रकाशन र अनलाइन खवर डटकममा उनले पत्रकारिता र साहित्यिक पक्षको संयोजन समपादनको अनुभव भएका व्यक्तित्व हुन् ।
पाँचौं वार्षिकोत्सवका अवसरमा विश्वपरिक्रमा परिवार साहित्य पोष्टको उत्तरोत्तर प्रगति र निरन्तरताको हार्दिक कामना गर्दछ ।
