‘आकाश ओढेको डोल्पो’ र ‘फूलबारीको जुके गणतन्त्र’ दुई नियात्रा कृति विमोचित

२० माघ २०८०, काठमाडौं

कवि तथा नियात्राकार भवानी खतिवडाको नियात्रा कृति ‘आकाश ओढेको डोल्पो’ तथा आस्था भट्टराईको नियात्रा कृति ‘फूलबारीको जुके गणतन्त्र’ एक समारोहवीच एकसाथ विमोचन भएको छ ।
समालोचक सावित्री मल्ल कक्षपतिले खतिवडाको विमोचित कृतिमा हिमाली जिल्ला डोल्पा, त्यहाँको भूबनोट, भाषा–संस्कृति र प्राकृतिक मनोरमताको बडो लालित्यपूर्ण तरिकाले लिपिबद्ध गरिएको हुँदा यो एउटा गहकिलो दस्तावेज हुन सक्ने भन्दै कृति नीति निर्मातासम्म पुग्नुपर्ने बताइन् ।
नियात्रा कृति ‘फूलबारीको जुके गणतन्त्र’कृतिमाथि साहित्यकार अनिता कोइरालाले समीक्षात्मक मन्तव्य राख्दै कलममा समाज, परिवार र देशप्रतिको बेजोड प्रेम रहेको बताइन् ।
विमोचन कार्यक्रममा सगरमाथा आरोही नीमा डोमाले यी दुवै कृतिकारलाई सफलताको शुभकामना व्यक्त गरिन् ।
कार्यक्रममा गङ्गाधर अर्याल, अरुण अर्याल, साहित्यकार पवन आलोक तथा रञ्जु दहालले शुभकामना मन्तव्य व्यक्त गरेका थिए ।
कार्यक्रममा वरिष्ठ साहित्यकार तथा पेज टर्नरका अध्यक्ष भुवनहरि सिग्देलले कृतिले नियात्राको उपल्लो चुली हिमाली क्षेत्रलाई समेटेर अगाडि बढेको र सर्जकबाट भविष्यमा यस्तै कृतिको अपेक्षा गरिएको बताए ।
कार्यक्रम सञ्चालन र संयोजनको भूमिका निर्वाह नियात्राकार प्रतीक ढकालले ‘हिमालको धनी देशमा जन्मेर हामीले त्यसको मर्म बुझ्न सकेका छैनौं, अब त्यो अभियानमा लाग्नुपर्छ,भन्दै ‘भवानी जस्ता धेरै महिला नियात्राकारले यस क्षेत्रमा कलम चलाउन जरुरी छ ।’
कृतिकारहरु नाताले आमाछोरी हुन् र सम्भवत आमाछोरीको नियात्रा कृति यसरी एकसाथ विमोचन भएको नयाँ दृष्टान्त हो ।