तारा केसी
बुढा बितेपछि घर भाडा र पेन्सनले जीवन धान्दै आएकी चरिमायालाई पाँच बर्ष पछि छोरा भेट्न आयो ।
उसले भन्यो, “आमा ! अब कति एक्लै बस्नुहुन्छ ? दु:ख बिराम पर्दा हेर्ने मान्छे कोहि छैन । यहाँको घर पुरै भाडामा लगाएर उतै बस्नेगरि जाऊँ । बुहारीले लिन पठाएकी । ”
छोराको कुरा सुनेर चरिमाया सोच मंग्न भइन्, “कहिले राम्रो नगर्नै बुहारीको आज कसरी मन पग्लियो ?”
“छिटो गर्नुस् आमा ! मैले सबै ब्यवस्था मिलाई सकेको छु। ”
छोरोले ढिपी गर्न थाल्यो । घर पुरै भाडामा लगाएर उनी छोराको पछि लागिन् ।
त्यसपछि, घरको भात भान्सा सरसफाई, बत्ती पानीको विल तिर्ने सब काम सासुलाई जिम्मा लगाईन् बुहारीले । एकदिन बुहारी फोनमा बोल्दै गरेको उनले सुनिन् । बुहारी भन्दै थिई, ” हजुरले दिनु भाको सल्लाह ज्वाइईंले मानिस्यो नी आमा ! अहिले त घरमा काम गर्ने मान्छे पनि राख्नु परेको छैन । उल्टै उताबाट उल्टो घरभाडा र पेन्सन पनि आउँछ । ”
कथाकार परिचयः तारा के.सी काभ्रे पनौतीमा जन्मेकी हुन् । उनको पहिलो रचना कविता “बिस्कुन” जनमत मासिकमा २०४९ सालमा प्रकाशित भएको थियो । उनको कलम कविता, बालसाहित्य , कथा, लघुकथा, मुक्तक, नाटक, संस्मरणमा चल्ने गरेको छ । उनका तारापुञ्ज (कविता संङ्ग्रह) २०६७, फूलबारी (बालकविता सङ्ग्रह)२०७० , फिन्को र टोरी (बालकथा संङ्ग्रह) २०७४, प्रिय छोरी (कविता संङ्ग्रह) २०७५ , गुरूको छनौट (बालकथा संङ्ग्रह) – २०७९ प्रकाशित छन् ।
