जिन्दगीमा

डा ऋषि बस्ताकोटी

 

यातना शिविरमा

प्रतिकार गर्दागर्दै

थाकेर थुचुक्क बस्नुअघिको

आस्थाको वन्दीलाई जस्तै

मलाई  अझै प्रहारहरू स्वीकार छन् ,

अन्तिम जित भेट्नुअघिसम्मका

एक एक हारहरू स्वीकार छन् ।

 

जिन्दगीमा

प्रहार आउँछन्

र त तिनले सतीसाल झैँ उभिन सिकाउँछन्,

हारहरूले हान्छन्

र त तिनले जिन्दगीमा जित्न सिकाउँछन्,

एकपछि अर्को जंघार आउँछन्

र त जुक्तिले ती जंघार तर्न सिकाउँछन्  ।

बाधाहरूले घरीघरी

आधा-आधा त पार्छन् नै यो मनलाई

तर पनि  तिनले

आखिर केही न केही त गर्न सिकाउँछन् ।

 

कवि परिचयः गोरखाको आँपपिपलमा जन्मेका ऋषि बस्ताकोटी हाल संयुक्त राज्य अमेरिकाको  नर्थ क्यारोलाइना स्थित केरी सहरमा बस्छन् ।  पचासको दशकदेखि नेपाली साहित्य लेखनमा सक्रिय बस्ताकोटी  मूलतः कविता, गजल, मुक्तक, गीत र निबन्ध लेख्न रुचि राख्छन् । उनका ज्वालाका रापहरू ( गजल सङ्ग्रह-२०५४) र विसंगत बस्ती (मुक्तक सङ्ग्रह -२०७९) प्रकाशित छन्।