कणाद महर्षि
सदाचार
इमानदारी
नैतिकता आदि
असल र आवश्यक
सत्य कुराहरू त्यागेर
ती सबैका ठिक उल्टा, अयथार्थहरू
सल्बलाउँदै,चल्मलाउँदै नाचिरहेका छन्
घमण्डले मात्तिएर हाँसीहाँसी बाँचिरहेका छन्
यी दूषित कुचेष्टा !
सहनशील भएर सधैं
कसरी व्यहोर्नु यथावत्
निर्घिनी,कलुषित परिवेशमा
—छि: छि: वाहियात !!
अब ज्वालामुखी फुटेर
ताता लाभाहरू हुँदै पग्लेर
दिनुपर्यो भयङ्कर आघात ।
* * *
कवि परिचयः कणाद महर्षि काठमाडौंका रैथाने कवि हुन् । उनको खास औपचारिक नाम कणाद मिश्र हो । विसं २०२२।२३ सालतिरबाट लेख्न शुरु गरेका उनको पहिलो कविता सङ्ग्रह “गुफा”(२०३१) हो । उनका अन्य कविता कृतिमा पग्लेका लाभाहरु(२०३४), भतेर र आँखाहरु(२०५०), घाउमा हरिभक्त कटुवाल(२०५८), दृष्टिको यात्रा (२०७२) रहेका छन् । उनको एक कथा सङ्ग्रह “कणादका कथाहरु (२०७१) समेत प्रकाशित छ ।
