रञ्जुश्री पराजुली
कालो घटालाई पन्छाउँदै
सर्वत्र उज्यालो छर्ने
हे प्रकृतिमाताका वरदपुत्र !
तिम्रो स्वर्णिम छटा युक्त
प्रभाती जन्म हेर्न
प्रतिक्षारत अनगिन्ती छविहरु
उत्साहित छन्
भिन्नभिन्न स्थानबाट
एउटै छटामा जन्मने तिमी
हे प्रभाती भानु !
स्वर्णिम किरण छर्दै
निमेष भरमा नै
आफ्नो पुर्ण छटा देखाउँछौ
सानो आकारबाट जन्मन
प्रयत्नरत लाली किरण युक्त
हे प्रभाती दिवाकर !
तिमीलाई अनन्त प्रणाम छ
ताल मेल संयोग र समयको
मिलनले विभिन्न स्थानबाट
तिम्रो प्रभाती दर्शन पाएँ
तर आज फेरि भाग्यले
पाताल देशको युटा राज्यबाट
पनि मैले तिम्रो पाएँ
स्वर्ण रञ्जित प्रभाती दर्शन
हे मेरा भाष्कर !
उहीँ रुप रङ्ग उहीँ समयमा
जन्मने कर्मयोगी तिमी
कर्मवादी बन्ने सन्देश फिजाउंछौ
चुक्दैनौ कहिले पनि
कर्म योगि बन्न
यो विश्वब्राह्मणमा तिमी
गतिशील भएर थपिरहेछौ
अनन्त स्वर्णिम उर्जा ।
